दशैँ

शरदको नीलो गगनमुनि, मुस्कुराउँछ प्रकृति माझ,

पुर्खा पौरख पावन धरोहर झल्किन्छ संस्कृति माझ !!

गाउँभरी सुकोमल बाल्यकाल हर्ष भाव दशैंमा आज,

मनभरि सुवास र स्मरण युगौँ युगौँको स्मृति माझ !!

-भिम मोर ✍️ 

शरदको नीलो आकाशमुनि प्रकृतिको काख मुस्कुराउँछ !! लाग्छ— धर्तीले युगौँदेखि चलेको सनातन चक्रलाई सम्झिरहेको छ, प्रकृति सधैँ सत्यको पक्षमा उत्सव मनाउँछ !!

​पुर्खाको पौरख पावन धरोहर आजभोलिको रमिता होइन; युगौँदेखि सत्यले असत्यमाथि विजय प्राप्त गरेको शाश्वत सत्य र हाम्रा पुर्खाले रगत-पसिना साटेर बचाएको चिनारी र सान, संस्कृतिमा टलक्क टल्किरहेको छ !!

​दुख, पीडा र आँसुका बीच... जीवनमा जति नै कष्ट, अभाव, आँसुका बाढी किन नबगुन्, विशेष दिन (दशैं) को आगमनले मनमा क्षणिक नै सही, अद्भूत बेग्लै उमङ्ग बोकेर ल्याउँछ !!

​बाल्यकालको सुकोमल हर्ष... दशैं आउँदा गाउँमा सुनिन्थ्यो— पिङको मच्चाइ, नयाँ कपडाको खुसी, बाल्यकालको निर्दोष हाँसो— आज फेरि मुटुको ढोका ढकढकाउन आइपुगेको छ !!

​युगौँ-युगको स्मृति... भौतिक रूपमा हामी जहाँसुकै जति नै टाढा भए पनि, मनको भित्री तहमा पर्वको सुवास, पुराना यादहरू कहिल्यै नओइलाउने बासना बनेर सधैँ बाँचिरहनेछन् !!